200 Jier lyn stoar de Ljouwerter Titia Bergsma, oant op de dei fan hjoed ferneamd yn Japan, Se kaam dêr op de Nederlânske hannelspost Deshima om’t har man der ‘opperhaad’ waard. Se soarge foar opskuor troch de shogun ûnder eagen te kommen en har selsfersekerde hâlding.

In ‘lytse bodder’ yn de Fryske striid is Gerben Colmjon wol neamd. Nei Harmen Sytstra hold hy de Fryske Beweging geande, sadat Troelstra en Kalma it letter fan him oernimme koenen. Troch selsstúdzje hat Colmjon him opwurke ta argivaris-bibliotekaris fan Fryslân. Hy hat him sawat dea skrept yn tsjinst fan it Frysk.

Yn de 17de iuw ûntjoech him yn Makkum in hieltyd belangriker skippersmienskip dy’t foaral hannel dreau mei kustfeart, oant de Lytse East (Noard-Dútslân en Denemarken). Kontakten yn Amsterdam en Hamburg brûkten de Makkumers om har wurkterrein almar út te wreidzjen, oant de Baltyske kust.