Oan de start fan Fryslân as eksportearjende suvelprovinsje kinst ien namme ferbine: Sietze Hepkema (1884-1963), earste direkteur fan it Coöperatieve Condensfabriek ‘Friesland’ yn Ljouwert. Ofrûne novimber kundige FrieslandCampina oan de kondinsearre molkproduksje yn Ljouwert te sluten. Dêrmei ferliest it konsern nei goed 110 jier de ferbining mei de oarsprong fan syn sukses. In portret fan Sietze Hepkema, dy’t de Fryske boer learde hoe’t je molke eksportearje.

De yn Drachten berne Ytsje Kooistra (1861-1923) jildt as ien fan de belangrykste Nederlânske ûnderwiispioniers. Se wegere om ûnderskied te meitsjen tusken de opfieding fan jonges en famkes en hie it as earste yn Nederlân yn wittenskiplike sin oer de term ‘puberteit’. By har ferstjerren yn 1923 waard se omskreaun as in ‘harmonisch ontwikkelde ziel, die als evenwichtig mensch vereerd en bemind werd door allen, die haar hadden leeren kennen.’

It Keninklik Frysk Genoatskip (KFG) bestiet yn 2027 200 jier. Om dat te fieren bringt it KFG in jubileumboek út mei biografyen fan 200 Fryske froulju dy’t libbe hawwe tusken 1827 en 2027. Haadredakteur fan it projekt is Tialda Hoogeveen, it boek moat op 8 maart 2027 (Ynternasjonale Frouljusdei) ferskine. Fryslân bringt foarútrinnend dêrop in searje fan tsien frouljusportretten.