Spanjaardslaan en Noordersingel hawwe in yntrigearjende skiednis. Ien dy’t begûn mei de Tachtichjierrige Oarloch. Mei de oanlis fan parken waard dizze westrâne fan Ljouwert yn de 19de en 20ste iuw in favoryt wenplak foar rintenierjende boeren, doktoaren en bankdirekteuren. Dy hienen wol wat sinten oer foar in fraaie filla.

Iuwenlang wie it in riedsel hoe’t Nederlanners yn de 16de en 17de iuw safolle flugger en goedkeaper as op oare plakken skippen bouwe koenen. Yn Harns is oan de hân fan in pear boarnen it plan opfette sa’n skip nei te bouwen. De inisjator, Gerald de Weerdt, fertelt hoe’t dat yn syn wurk gie en lûkt konklúzjes oer syn foargongers.

Desennia lang bewarret it Fries Verzetsmuseum twa buorden mei teksten fan Jan Pietersz. Coen. Mar net ien wist wat se betsjutten, wêr’t se wei kamen, wat de famyljes Hepkema en Tichelaar dermei te krijen hienen. Oanhâldend speurwurk ûntraffelet de ôfkomst.